Diario libertario de lugo e galaxia

Claudio Rodríguez Fer apresentará na Bretanha: os amores profundos

07/05/2016
12:26

O escritor libertário Claudio Rodríguez Fer, professor da Universidade de Santiago de Compostela, apresentará o seu livro *Os amores profundos*, traduzido ao francés como *Les amours profonds*, em quatro cidades da Bretanha: Lorient, Saint-Malo, Rennes e Brest. Trata-se dumha antologia geral da súa poesía, que recolhe numerosos poemas escritos na Bretanha (onde exerceu como professor visitante nas universidades de Rennes e de Lorient), assi como noutros lugares da França, como París, Provenza, Aquitania ou Normandía.

As secçons “Brigitte Rimbaud” e “Viaxes a ti” tenhem temática predominantemente amorosa, mentres que a titulada “Memorias e resistencias” contem poemas civís e memorialistas, incluído o até agora inédito em livro “Arsenal da barbarie”, inspirado polos exiliados espanhois que forom escravizados e mesmo assassinados polos nazis na Bretanha durante a súa ocupaçom da França.

A ediçom e a introduçom de *Les amours profonds* foi efectuada pola investigadora e ensaísta María Lopo, doutora em Literatura Francesa pola Universidade da Alta Bretanha, e conta com versons dela mesma e de tres tradutoras francesas: a também galicista Annick Boilève-Guerlet, a hispanista Michéle Lefort e o galizanista Claude Henri Poullain. O livro publicou-no a Editorial Folhas Novas e conta cumha ilustraçom em espiral na cuberta da artista galega Sara Lamas.

A primeira apresentaçom terá lugar o 4 de maio na Universidade Bretanha Sur de Lorient e correrá a cargo do autor e da editora apresentados pola profesora Immaculada Fàbregas, cujo alumnado recitará em francés. A segunda será realizada o 6 de maio também polo poeta e prologuista, precedidos dumha intervençom da historiadora Gabrielle Garcia, num auditório da mediateca La Grande Passerelle de Saint-Malo. Mais adiante, já em junho, a obra será apresentada em sendas livrarias de Rennes, em cuja universidade foi investido o autor Doutor Honoris Causa actuando de madrinha a professora Françoise Dubosquet, e de Brest, onde foi nomeado presidente de honra da asociaçom Memoria do Exilio dos Republicanos Espanhois em Finistère.

Claudio Rodríguez Fer já publicara em bretóm a antologia de temática celta *Muioc'h kalz eget mil bloaz* (*Muito mais que mil anos*) no ano 2000 e, em francés, as obras *Voyages à toi* (*Viagens a ti*) e *La pièce bretonne* (*O quarto bretom*), em 2008 e 2014, respectivamente, ambas também relacionadas coa Bretanha, umha das súas terras de adopçom vital, professional e literária.

Sección: